BAGUIO CITY – Simmuko iti gobierno ti maysa a lolo a sigud a miembro ti Communist NPA Terrorist babaen iti tulong ti 50th Infantry Battalion ken ti Kalinga Provincial Police Office sadiay Kibog, Apatan, Pinukpuk, Kalinga itay laeng nabiit.
Binigbig dagiti otoridad ti sigud a rebelde a ni alyas Stan, 64-anyos, miyembro ti Squad Dos, Platoon Guevara, Kilusan Larangang Guerilla Baggas ti Communist Terrorist Group (CTG).
Naamoan nga inaramat ni Alyas Stan ti CTG kas courier idi 1987 ken nagbalin a miyembro ti Militia ng Bayan idi 1988 ken nagsapata kas regular a miembro ti CTG idi 1995.
Binusbosna ti panawenna kas miembro ti CTG ken saanna a nakadkadwa ti pamilyana ngem babaen ti tulong ti pamilya ken kakabagyan dagitoy ket naallukoy nga agsubli iti gobiero.
Iti agdama ket agsagsagaba ni alyas Stan iti sakit iti puso a saan pay a naipapaayan iti medikal nga atensyon.
Kagiddan iti dayta, aw-awisen manen dagiti otoridad ti isusuko ken panarugi manen iti baru nga biag dagiti nabatbati a miyembro ti CTG babaen ti Enhanced Comprehensive Local Integration Program a nakasagana nga ipaay ti gobyerno kadagitoy.
