BAGUIO CITY – Pimmusay ti maysa nga estuydante kalpasan a maaksidente dagitoy agarup 1:50 idi parbangun ti Abril 19 sadiay Calaba Bridge, Brgy. Calaba, Bangued, Abra.
Nabigbig ti pimmusay a ni Sherwin Montero, agtawen iti 21, baru, estudyante ken agnanaed sadiay Sitio Kabildatan, Brgy. Zone 7, Bangued, Abra.
Sigun iti bangued municipal policed station, imanmaneho ti maysa nga menor de edad ti maysa a motorsiklo ken backrider ti biktima nu sadinno agpada a naka-inom wenno addaanda iti impluwensia ti arak.
Saan a nakontrol ti driver ti manibela ti motorsiklo kalpasan nga aksidente a nakapatulidda iti bato kabayatan ti panagturongda iti plaza ti Bangued.
Nagsagrap dagitoy iti multiple injuries ken dagusda a naiturong iti Abra Provincial Hospital ngem naideklara nga dead on arrival ti backrider a ni Montero bayat nga manarimaan ti panakataming ti driver.
