BAGUIO CITY- Tarigagay ti 86-anyos nga ina manipud Magaogao, Pinukpuk, Kalinga a makita iti maudi a gundaway ti anakna nga OFW a pimmusay sadiay Malaysia.
Pimmusay ni Leopoldo Labbutan, 38-anyos, idi Mayo 30 iti Sultanah Aminah Hospital sadiay Johor Bahru, Malaysia gapu iti Sepsis, Multi-organ failure ken Colitis.
Sigun kenni Franklin Balcanak Castro, kabagyan ni Leopoldo, naudi a nagkita da Leopoldo ken ti inana, tallo a tawenen ti napalabas.
Nagtrabaho ni Leopoldo kas waiter iti nasao a pagilian.
Kinuna ni Castro nga awan ti ammona a daduma a sakit ti kabagyanna malaksid laeng iti asthma idi pimmanaw daytoy iti pagilian.
Nupay kasta, idi nagtrabaho sadiay Malaysia ket ditoy a naala ken nariknana ti sakitna ngem saanna nga impakaammo iti pamilyana.
Naamoan laeng ti pamilyana ti sakitna idi naitaray iti ospital idi Mayo 25.
Naadmitar pay ni Leopoldo iti ospital iti lima nga aldaw sakbay a pimmusay.
Iti agdama ket agtaltalinaed ti bangkay ni Leopoldo iti morgue ti nasao nga ospital.
Sigun kenni Castro, nabayadanen ti hospital bills ti kabagyanna ngem saan paylaeng a maiyawid gapu iti kinakurang ti financial resources.
Dinakamatna a tapno maiyawid ti bangkay ni Leopoldo iti pagilian ket kasapulan ti P400,000.
Gapu iti daytoy, agkidkiddaw ti pamilya iti aniaman a tulong.
Para kadagiti naayat a tumulong ket kontaken laeng ni Franklin Castro iti numero 09452231256.
