BAGUIO CITY – Pimmusay ti maysa nga indibidual bayat a nadangran ti kadwana kalpasan a natamaan ti naglugananda nga Tamaraw FX iti natnag a dakkel a bato sadiay Km 53, Cattubo, Atok, Benguet itay malem.
Nabigbig ti pimmusay a ni Richardick Cayacay, 52-anyos bayat a ti nadangran ket ni Susan Ubongen, 59-anyos, agpada a residente ti Poblacion, Tadian, Mt. Province.
Saan met a nadangran ti driver a ni Manuel Lictao Ubongen Jr. ken ti maysa a pay a pasahero a ni Jaromir Cayacay Ubongen, 15-anyos.
Maibasar iti inisyal nga imbestigasyon, nagtaud ti nasao a Tamaraw FX sadiay Mt Province ken paturong daytoy sadiay La Trinidad, Benguet.
Nupay kasta, aksidente a natinnagan ti lugan iti bato rason a natamaan dagiti dua a pasahero.
Naiturong dagiti biktima iti Atok District Hospital sadiay Sayangan, Paoay, Atok, Benguet ngem naideklara ni Richardick Cayacay kas dead on arrival.
Nagsagrap met ni Susan Ubongen ti dunor iti ulona nga iti agdama met maag-agasan iti ospital.
Agtultuloy met nga im-imbestigaran dagiti otoridad ti danyos iti nasao nga insidente
