BAGUIO CITY – Pimmusay ti maysa nga indibidual bayat a dumanon iti minilmilyon a pisos ti danyos iti panakauram ti dua a wood carving warehouse ken maysa a balay sadiay Green Woods Subdivision, Km. 6, Asin Road, Tuba, Benguet idi rabii.
Iti panakiuman ti Bombo Radyo Baguio kenni Senior Fire Inspector Glenn Pang-et, Fire Marshal ti BFP-Tuba, kinunana nga agarup nasurok P5-M ti danyos ti napasamak nga uram a pimmaut iti nasurok maysa nga oras.
Binigbigna ti pimmusay a ni Luis Monliting, 25-anyos, maysa a wood carver, no sadino, totally burned daytoy.
Binigbigna met dagiti agtagikua kadagiti warehouse a da Dexter Bucasan ken James Kidongen.
Dinakamatna a dakkel ti danyos iti uram gaputa nairaman dagiti makinarya ken dagiti finished products dagitoy, pakairamanan dagiti kayo a maaramid paylaeng nga iskultura.
Iti inisyal nga imbestigasyon ti BFP-Tuba, sakbay ti insidente ket naaddaan ti selebrasyon ti panagkasangay sadiay ken kalpasanna ket naturong ti biktima iti kampo daytoy agingga a nairaman a nauram.
Agtultuloy met ti imbestigasyonda iti rason wenno nangitunda iti nasao nga uram.
