BAGUIO CITY – Dead on arrival ti maysa nga indibidual iti aksidente wenno panakatnag ti lugan iti rangkis sadiay Brgy. Bayyo, Bontoc, Mt. Province idi kalman, Abril 29 (3:20PM).
Nabigbig ti pimmusay ken maysa kadagiti pasahero a ni CHARITY VICENTE, 54-anyos a lalaki ken residente ti Silang, Cavite.
Nabigbig pay ti driver ti Montero Mitsubishi a ni HECTOR ARANA, 64-anyos a lalaki ken residente ti Montalban Rizal ken dagiti pasaherona a da CADEN LEX LUCAS-5yrs old; MYLENE LUCES-35 anyos; MAXIE ALMERINO-5 anyos; MELIZA ALMERINO-45 anyos ken VERGILLIO LUCES-38 anyos ken amin dagitoy ket residente ti Silang Cavite.
Maibasar iti report, napartak ti panagtaray ti driver ti maysa nga black Montero Mitsubishi nga addaan iti plaka nga EMA902 paturong sadiay Poblacion, Bontoc idi nabanggana ti maysa nga blue Toyota Tamaraw FX nga addaan iti plaka nga No.UDF724 manipod iti sabali nga direksion ti kalsada ken paturong met sadiay Banaue, Ifugao.
Naibangga ti Tamaraw FX iti bantay a paset ti kalsada ken natnag met ti Montero Mitsubishi iti 60 metro ti kaunegna a rangkis.
Dagus a naiturong dagiti biktima iti ospital kalpasan ti panagresponde ti personnel ti Bontoc MPS ken dadduma pay nga volunteers.
Nupay kasta, naideklara nga dead on arrival ti maysa kadagiti pasahero bayata a manarimaan ti panagpaagas dagiti dadduma pay a biktima.
