BAGUIO CITY – Nakemmeg ti maysa a menor de edad a maikonkonsidera a child in conflict with the law iti buy-bust operation nga insayangkat dagiti operatiba sadiay Naguilian Road, partikular iti Lourdes Extension Subdivision, Baguio City.
Sigun iti Baguio City Police Office, ti suspek ket maysa a balasitang a 17-anyos ken out-of-school youth.
Nakumpiskar kenkuana ti maysa a pakete ti mapapati a shabu ken ti naaramat a buy-bust money.
Nakumpiskar pay manipud iti ikot ti balasitang ti walo a pakete ti mapapati a shabu a naikabil iti maysa a coinpurse.
Kabayatanna, nakemmeg met ti maysa a vegetable packer iti buy-bust operation nga insayangkat dagiti operatiba sadiay Puguis, La Trinidad, Benguet idi kalman.
Nabigbig daytoy a ni Aren Pagaduan Cortez alyas Tangad, 30-anyos, naasawaan, tubo ti Aparri, Cagayan ken residente ti Puguis, La Trinidad, Benguet.
Nakumpiskar kenkuana ti dua a pakete ti mapapati a shabu ken ti naaramat a buy-bust money.
Nupay kasta, saan a nakumpiskar ti inaramatna a cellphone iti transaksion gaputa imbarsakna daytoy iti waig.
