Nagkomento ti Mines and Geosciences Bureau iti alegasyon a maysa dagitoy iti rason ti masansan a panagreggaay ti slope a nakaipasdekan ti rockshed sadiay Sitio Camp 6 Barangay Camp 4, Tuba, Benguet.
Iti panakiuman ti Bombo Radyo kenni Raymanne Mabazza, Supervising Geologist kinunana nga adda ti paset ti bantay a naideklara kas “minahan ng bayan” idi May 6, 2021 nga adda iti kalawa a 31.25 nga ektarya.
Inlawlawagna saan a daytoy ti rason iti panagregaay ti slope iti nasao a rockshed agsipud ta adayo daytoy iti nasao a kalsada.
Gapu iti dayta, impettengna a ti rason ti panagregaay ken panakadadael ti paset ti rockshed ket gaputa very high landslide susceptible ti nasao a lugar no sadino ti bantay ken dagiti bato sadiay ket fractures wenno weathered daytoy.
Innayonna a ti bantay a nakaipasdekan ti rockshed ket saan laeng a naminsan ti panagreggaay daytoy.
Kagiddan dayta, kinuna metlaeng ni Santiago Bugnosen-Engineer 2 ti Chief ti Mine Monitoring Technical Services Section nga adda man dagiti sigud a nagminminas iti asideg ti nasao a bantay ngem na-sealed daytoyen idi paylaeng napalpalabas a tawen.//Bombo Noveh Organo
