BAGUIO CITY- Naragsakan ni PDEA-Cordillera Regional Director Gil Cesario Castro iti desisyon ni Judge Lilybeth T Sindayen-Libiran manipud RTC Branch 61 Baguio City a nangkumbiktar iti miyembro ti illegal drug group a ni Bertito Ilumin Ramirez iti tungpal biyag a panakaibalud ken multa a kagudua a milyon a pisos.
Nakedngan a guilty ti nasao nga indibidual iti kaso daytoy a panaglabsing iti Section 5 ti Comprehensive Dangerous Drugs Act of 2002.
Napatawan pay daytoy iti kanayunan a pannusa a sangapulo ket uppat a tawen a panakaibalud ken multa a dumanon iti P300,000 gapu iti pananglabsingna iti Section 11 ti nasao met laeng linteg.
Maipalagip a nakemmeg ni Ramirez idi Abril idi napan a tawen iti entrapment operation nga impatungpal dagiti autoridad sadiay SLU-SVP Barangay, Baguio City.
Kinuna ti PDEA-CAR a maibilang daytoy kas public enemy gapu iti serye iti kriminalidad a nakairamananna iti siyudad ti Baguio ken probinsiya ti Benguet.
