Blanko paylaeng ti pakabigbigan ken motibo dagiti suspek a nangbagsul iti 66 anyos a babae iti siyudad ti Baguio.
Iti pannakiuman ti Bombo Radyo kenno Pmaj. Marcy Marron, pannakangiwat ti Baguio City Police Office, kinunana nga awan paylaeng ti makitkita a motibo dagiti suspek agsipud ta awan ti aniaman a sanikua ti biktima a napukaw iti pagtaengan daytoy.
Kinunana a saanda metlaeng a maitudo dagiti suspek agsipud ta awan ti ebidensya a maipakitada.
Nupay kasta, sigun kadagiti nakakita naimatanganda dagiti lallaki a nakalugan iti taxi a bimmaba iti batog ti pagtaengan ti nadakamat a biktima ken ditoy da metlaeng a nadengngeg ti pukkaw ti biktima.
Gapu iti daytoy, dagus met a naiturong ti biktima iti ospital ngem naideklara metlaeng a dead on arrival.
Maipalagip a nagsagrap ti biktima iti pammagsol iti barukong a nangitunda iti ipupusay daytoy.
Kabayatanna, kidkiddawen met ni PMaj. Marron kadagiti nakikita a tumulong dagitoy tapno mabigbig dagiti suspek.
Iti agdama, maur-uray paylaeng ti resulta ti autopsy ti bangkay ti nasao a biktima.
