BAGUIO CITY – Pagsagsaganaan ti lokal a gobyerno ken ti mangimatmaton iti Mount Pulag National Park a masarakan sadiay Kabayan, Benguet ti umadanin a panakailukat ti nalatak a bantay.
Sigun kenni Park Superintendent Emerita Albas, maipimpinalen dagiti polisiya ken pagalagadan nga ipaulog dagitoy kagiddan ti panakapalukay ti quarantine status iti probinsya ti Benguet.
Kinunana nga iti agdama ket addan dagiti inisyal a polisiya a nasken a suruten dagiti umili manipud iti Baguio ken Benguet a kayat ti agpasyar iti Mount Pulag kas iti panakalimitar ti bilang dagiti mapalubosan a bisita a sumang-at iti bantay tapno masurot latta ti 50% capacity kas maitunos iti paglintegan ti nasional a gobierno.
Dinakamatna a malimitaran metlaeng ti oras ti panagtalinaed dagiti turista iti summit wenno tuktok ti Mount Pulag.
Napagnumuanda a saan paylaeng a maipalubos ti panagcheck-in dagiti bisita kadagiti balay-pagdagusan sadiay Kabayan ngem ketdi mairekomendar ti panag-camping dagitoy kadagiti naituding a camping site sadiay.
Sigun pay kenni Albas, ipangrunada dagiti indibidual a nakapagreserba idi napalabas a tawen.
Dakkel metlaeng ti posibilidad nga ikalikagumda kadagiti turista ti negatibo nga antigen wenno RT-PCR test result sakbay makapasyarda iti nasao a bantay.
Inlawlawagna a ti maipaulog a pammilin ket para iti seguridad dagiti dagiti bisita ken dagiti tour guides iti Mount Pulag.
Naituding nga agtaripnong ti opisina ti Mount Pulag National Park tapnu maipinal ti maipaulog a polisiya ken tapno maamwan ti eksakto a petsa ti panakailukat ti nasao a bantay para kadagiti turista. (-report ni Bombo Janice Juanito)
