Dumanun iti nasurok sangagasut nga indibidwal ti naapektaran iti uram a napasamak sadiay MRR Queen of Peace Barangay, Baguio City itay agsapa.
Iti panakiuman ti Bombo Radyo kenni Raul Sudio Caronongan, kapitan ti nasao a barangay, kaadwan kadagiti naapektaran ket estudyante manipod sabali a lugar nga agad-adal iti Baguio City.
Sigun kenni Caronongan, tallo a boarding house ken maysa a residential house ti karaman iti uram nu sadino, light materials ti naaramat iti sumagmamano kadagitoy.
Dinakamat ni Caronongan a saanen a mabalin a pagyanan pay dagiti nauram a pasdek. Dagiti laeng met laptops ken cellphones ti nabaelan nga isalba dagiti residente.
Innayon ti kapitan a saan a nagkurang dagitoy iti inpatungpalda a koordinsyon kadagiti nagduduma nga opisina a mabalin a makaipaay ti tulong kadakuada.
Kinunana a dagus dagitoy a nag-anunsyo nu sadino, nagaramatda ti megaphone tapno maalarma dagiti residente ken rumwar dagitoy kadagiti pagtaenganda idi nangrugi ti uram.
Nupay kasta, napartak a nagramaram ti apoy manipod iti nagtaudanna ken saan a nanamnama a makadanun daytoy iti kaabayna a pasdek.
Gapu ti dayta,kidkiddawen ni Kapitan Caronongan ti panakipatungpal ti binulan nga inspeksyon kadagiti kable ti kuryente kasta met kadagiti kalsada.
Impettengna a masapol a liklikan ti agparada kadagiti kalsada iti nasao a lugar tapno napartak a makagaraw dagiti rumesponde tunggal adda emergency nangruna ta nailet laeng daytoy.
Mapalpalagipan met ti publiko nga agannad dagitoy ken lilikan nga ipatungpal dagiti banag a mabalin a pagtaudan ti uram.//Bombo Jez-Bombo Rob
