BAGUIO CITY – Pinirmaanen dagiti maseknan nga opisyal ti municipio ti Tuba ken Sablan, Benguet ti resolusion seknan iti panakarisot ti nabayagen a boundary dispute dagitoy.
Sigun kenni Sablan Mayor Manuel Munar Jr, napirmaan ti Joint Resolution No. 01 Series of 2021 wenno “Joint Resolution Amicably Establishing and Defining the Boundary of the Municipality of Sablan and the Municipality of Tuba Both in the Province of Benguet.” iti sangwanan da Benguet Vice Governor Johnny Waguis ken dagiti Benguet Board Members.
Mainaig iti daytoy, kinunana nga adda iti naisayangkat a taripnong, feild surveys ken ocular inspection sakbay a naipatungpal ti nadakamat a panagpirma dagitoy.
Kagiddan iti daytoy, inlawlawag ni Munar a dumanonen ti walo a dekada naglabas iti boundary dispute dagitoy partikular sadiay Barangay Bayabas, Sablan ken Barangay Tadiangan, Tuba, Benguet.
