Nangipatungpal ti nagduduma nga gimmick dagiti sumagmamano nga hotel accommodations iti Baguio City kagiddan ti panakarambak iti Valentine’s day.
Naobserbaran a sumagmamano kadagiti turista ti nagturong iti City of Pines a pangrambakan iti nasao a pasken gapu iti cuddle weather a mabalin a marikna iti daytoy.
Iti panakiuman iti Bombo Radyo ken Andrew Pinero, Media Relations Officer ti Hotel & Restaurant Association of Baguio, imbinglayna a sumagmamano nga hotel accommodations ti nangipaay iti special rates ken promos a kas kadagiti romantic dinner promos.
Mainaig iti dayta, immuna metten a sinuspindir iti lokal a gobyerno iti Baguio City ti trabaho kadagiti government offices sipud alas tres ti malem ita nga aldaw tapno maipaayan ti gundaway dagiti empleyado a rambakan ti Valentine’s day kadwa dagiti ay-ayatenda iti biag.
Nupay kasta, saan a karaman iti daytoy dagiti agtrabtrabaho iti frontline offices kas iti serbisyo para ti peace & order, revenue collection, disaster risk reduction and management, CCTV ken emergency 911 operations, sanitation, ken health.//Bombo Mera Pacpacan
