BAGUIO CITY – Dinayaw ti dadaulo ti Philippine National Police ti Cordillera PNP kabayatan ti panagsarungkarna sadiay Camp Dangwa, La Trinidad, Benguet idi kalman.
Iti panagbitlana, inapresiar ni PNP Chief Dionardo Carlos ti OPLAN BAYANIHAN ti Police Regional Office Cordillera (PROCOR) a mangipapaay iti tulong kadagiti apektado iti bagyo.
Sigun kenkuana, dakkel a tulong ti naur-or ti PNP-Cordillera a dumanon iti P4.5M a maipaay kadagiti residente ti Visayas ken Mindanao.
Kinunana a ditoy a nakita ti kinamanagtulong dagiti Cordilleran police kadagiti biktima ti a kalamidad ken ken napaneknekan ti Police Big Brother Concept para kadagiti biktima ti kalamidad.
Immunan a nagboluntaryo ti pulisya iti rehiyon Cordillera a mangidonar iti sag-P500 ken sag-P100 met kadagiti non-uniformed personnel tapno maipaay a tulong sadiay Southern ken Central Visayas.
Maipalagip a nagipatulod metlaeng ti PROCOR iti relief goods nga aggatad iti nasurok P500K kadagiti biktima ti Bagyo nga Odette sadiay Cebu ken Bohol kas inisyal a donasyon.
Nagbalin pay a mensahe-iti panagbitlana ti panagtalinaedna a disiplinado, de korum ken distinct dagiti pulis iti rehion.
