Mapaspasaran dagiti motorista ken pasaheros ti nailet a gunay ti trapiko idiay La Trinidad, Benguet kagiddan ti panakaipatungpal ti proyekto a “Reconstruction to Concrete Pavement-Baguio-Bontoc Road” manipud Km.3 (Stobosa) agingga Km.5, La Trinidad, Benguet.
Gapu iti dayta, makidkiddaw ti panakaawat ken kooperasyon ti publiko iti maipatpatungpal a road construction a para iti pagimbagan ti amin iti kanito a malpas daytoy.
Narugian metten ti panakaaramid ti tengnga ti kalsada, rason a nagbalin a one-way dagiti agsinumbangir a kalsada a paturong iti siudad ti Baguio ken iti La Trinidad wenno Halsema Highway.
Nakadeploy met dagiti pulis para iti panakaimanehar ti nasao a trapiko.
Kabayatanna, maisingsingasing kadagiti pampribado a lugan a paturong iti siudad ti Baguio a mabalin a dalyasatenda ti alternatibo a ruta a Lamut, Beckel Road wenno Long-Long-Tam awan Road tapno maliklikanda ti trapiko.
Iti nasao a proyekto, agarup P127 million ti pondo a nailatang iti daytoy bayat a manamnama nga aglepas daytoy inton Hunyo 21 inton sumaruno a tawen.
Immuna met a kinuna ni Mayor Romeo Salda a maigiddan a matarimaan ti panakaibangon ti overpass iti paset ti kilometer 5 idiay La Trinidad, Benguet.//Bombo Mera Pacpacan
