BAGUIO CITY – Inlawlawag ti Department of the Interior and Local Government (DILG) ti naladaw a panakaipaay ti sweldo dagiti contact tracers iti probinsya ti Benguet
Kasaruno daytoy ti reklamo dagiti sumagmamano a contact tracers seknan iti naladaw a panangawatda kadagiti sweldo dagitoy.
Sigun kenni DILG-Benguet Provincial Director Rufina Fegcan, naladaw ti panangisubmitir dagiti dadduma a munisipyo iti requirements kas iti accomplishment report a kasapulan nga ipasa dagitoy iti binulan.
Kinunana a gapu iti daytoy ket maapektaran latta dagiti nasapa a nangipasa iti report-da gaputa centralized ti panakaipaay iti sweldo dagitoy.
Innayonna a nasken nga urayenda pay dagiti naladaw a reports dagiti dadduma a contact tracers sakbayda nga ipasa daytoy iti DILG Regional Office.
Kabayatanna, dinakamatna a kisayyanda iti 30% ti alaenda a bilang dagiti contact tracers ita a tawen 2021 manipod iti orihinal a bilang daytoy.
Sigun kenni Dir. Fegcan, dumanon laengen iti 15,000 a contact tracers ti alaen ti DILG ita a tawen, nababbaba no idilig iti sigud a 50,000 bayat a dumanon laeng iti 267 ti maiwaras ditoy rehiyon Cordillera.
