BAGUIO CITY – Iyap-apela dagiti jeepney drivers iti maseknan nga ahensiya ti gobyerno ti nangatngato pay a plete kasaruno ti panagngato ti presyo dagiti produkto a petrolyo ita nga aldaw.
Iti interview ti Bombo Radyo, kinuna ni Pat Evangelista, presidente ti maysa a transport group iti Cordillera ken Region 1, awan paylaeng ti dua a lawas ket dakkelen ti ngimmatoan ti presyo dagiti produkto a petrolyo.
Gapu iti daytoy, impettengna a saan nga umdas ti maysa a piso a ngimmatoan ti plete.
Impeksa ti opisyal a nu saan a ngumato ti plete iti sumaruno nga innem a bulan ket awanen ti pangsustento dagiti jeepney drivers iti pamilya dagitoy.
Sigun pay kenni Evangelista, ad-adda a nadagsenan dagiti drivers gapu iti nangina a singir nu agala ti fare matrix.
Dinakamatna a saan nga amin a jeepney drivers ket agsingsingir ti kanayonan a plete gaputa 60% laeng ti nakaala ti fare matrix.
Pagyamyamanan met ni Evangelista dagiti pasahero nga agbaybayad ti umno ken dagiti saanen nga agal-ala ti baryada gaputa dakkel a tulong daytoy kadakuada.
Malaksid iti panagngato ti plete, kidkiddawen pay ti transport group iti gobyerno ti pabahay para kadagiti drivers, insurance ken medical assistance.//Marjorie Salting
