BAGUIO CITY – Boluntaryo a simmuko ti maysa a nangato nga opisyal ti Ilocos-Cordillera Regional Committee (ICRC) ti Communist Party of the Philippines-New People’s Army (CPP-NPA) kadagiti militar ken pulisya sadiay Bontoc, Mountain Province idi kalman.
Nabigbig daytoy a ni alyas Ka Digbay a First Deputy Secretary ti ICRC ti CPP-NPA ken commanding officer pay ti Kilusang Larangang Guerilya BAMPIS Chadli Molintas Command.
Sigun kenni Brigadier General Laurence Mina, commander tu 5th Infantry Division, Philippine Army, ti panagsuko ni alyas Ka Digbay ket resulta ti serye dagiti negosasyon a nangrugi idi pay March 2019 nga indauluan ti pulisya ken militar.
Agtalekda a dakkel ti epekto ti panagsuko ni Ka Digbay iti liderato ti komite nangruna kadagiti kameng ti rebelde a grupo kadagiti rehiyon ti Ilocos ken Cordillera.
Gapu iti daytoy, al-allukuyenna manen dagiti nabatbati a kameng ti rebelde a grupo iti panagsuko dagitoy ken iti panagsublida iti sidong ti gobyerno tapnu maaddaanda iti natalinaay a biag kadwa ti pamilyada.
