Awan ti nadangran iti napasamak a vehicular traffic accident iti paset ti sigud a Nagoya inn area sadiay Naguilian Road, Purok 18, Irisan, Baguio City itay ala una y media iti pangalaw ita nga aldaw.
Nakairamanan daytoy ti 22 wheeler truck a naglaon iti semento nga imanmaneho ti agtawen iti kwarentay uno a lalaki, residente sadiay Naguilian, La Union.
Napasamak ti aksidente gapu iti mechanical defect ti lugan bayat a pababa daytoy iti outbound lane manipud City Proper a nangitunda iti pannakatumbana.
Dagus met a nagresponde dagiti personnel manipud Baguio City Police Office, Police Station 9, volunteers ken dadduma pay tapno ikkaten ti kargana a semento.
Malaksid iti dayta, nagtitinnulong pay dagitoy a nangikarga iti batbato iti igid ti kalsada a nagnaan dagiti limmabas a lugan.
Kagiddan dayta, nagpalagip ni Police Captain Freddy Chumayag, Operation Police Commision Officer iti Police Station 9 kadagiti amin a travelers ken commuters nga ipangpangrunada dagiti safety measures kas iti panangsukimat iti lugan sakbay nga agrubwat nasken a sukimaten dagiti bateryana, ken dadduma pay tapno maliklikan ti kapada nga aksidente.
