BAGUIO CITY – Nasurok maysa a million a pasahero ti nagnumar iti libreng sakay a programa ti Land Transportation Franchising and Regulatory Board (LTFRB)-Cordillera.
Manipud Abril 16 agingga Mayo 17 ket dimmanonen iti nasurok maysa a million ti nailista a pakabuklan a bilang dagiti pasahero a naserbisyoan ti Libreng Sakay iti rehion.
Iti agdama ket adda ti 76 a Modernized Public Utility Jeepney ti agpaspasada para iti Libreng Sakay kadagiti ruta ti Baguio ken Benguet pakairaman ti Baguio Plaza – Trancoville; Baguio Plaza – Aurora Hill; Bontoc – Bauko, Mt Province; Ambayao – La Chesa, Baguio City; Baguio City – La Trinidad; Baguio Plaza – BGH – Campo Sioco; ken Baguio Plaza – Camp 8- Poliwes- San Vicente.
Ti service contracting program ket panggepna a tulongan dagiti operator ken driver a naapektaran iti COVID-19 pandemic ken iti agtultuloy a panagngato ti presyo ti gasolina.
Babaen iti nasao a programa ket bayadan ti gobyerno dagiti operator ken driver kas maibasar iti bilang ti biyahe a tarayen dagitoy tunggal lawas.
Patien ni DOTr Secretary Art Tugade a dakkel metlaeng ti mainot a pamasahe dagiti commuter nangruna ta agtultuloy ti panagngato ti presyo dagiti kangrunaan a gagatangen.
Manamnama a manayonan pay ti nasao a bilang dagiti pasahero a maipaayan ti libre a serbisyo babaen iti panaglukat dagiti daduma a ruta ti Libreng Sakay para kadagiti health workers iti sumarsaruno nga aldaw.
