BAGUIO CITY – Dinadael dagiti mabigbigbig a “Coplan First Giant” nga operatiba ti Police Regional Office Cordillera ti nasurok P116.18-milyon a pakabuklan a gatad ti marijuana plants ken marijuana oil a nadiskubreda manipud iti sangapulo a plantasion iti Mt. Chumanchill sadiay Loccong, Tinglayan, Kalinga.
Naipatungpal ti big time marijuana eradication idi Setyembre 15 agingga 17 iti agdama a tawen.
Maibasar iti report, nabaelan dagiti operatiba a dadaelen ti 44,350 a pidaso ti Fully Grown Marijuana Plants nga aggatad iti P88.49-M ken naimula iti 44,350 metro kwadrado ti kalawana a lote.
Nadiskobreda pay manipud iti dua a sites nga agserserbi a production area ti nasurok kumurang a 230 a kilo ti napagang a bulong ti marijuana nga aggatad iti P27.60-milyon ken 14 a botelya ti marijuana oil nga aggatad met iti P308K.
Nauram dagiti nadakamat a mula iti naisayangkatan ti operasion bayat a maim-imbestigaran ti pakabigbigan dagiti posible a cultivators dagiti nadadael a marijuana.
