--Ads--
BAGUIO CITY – Nangidonar ti Ifugao Provincial Police Office (PPO) iti P134,300 a financial assistance kadagiti pamilya dagiti biktima ti bagyo a Ulysses sadiay Ifugao.
Naurnong ti nasao a gatad babaen iti kontribusyon dagiti personnel ti Ifugao PNP ken direkta a naipaima daytoy kadagiti pamilya dagiti 13 a biktima ti landslide sadiay Banaue, Ifugao.
Malaksid iti dayta, naaramat ti dadduma iti cash contributions iti pannakagatang ti bagas ken grocery items a naiwaras met kadagiti dadduma a naapektaran iti bagyo.
Iti agdama, agtultuloy ti panangipatungpal ti Ifugao PNP iti relief operations kadagiti naapektaran iti kalamidad.
