TEL AVIV, ISRAEL – Kimmaro ti gubat iti Israel ken kadagiti kabangibangna a lugar segun ken ni Jhom Ramos Eugenio, Bombo International News Correspondents manipud Tel Aviv, Israel.
Iti pannakiyuman ti Bombo Radyo kenkuana, kinunna nga agtul-tuloy paylaeng dagiti nakabutbuteng a maipatpatulod a missile kadagiti kabangibang a lugar dagitoy, nangrunna ta agarup dua angingga tallo a kilometro ti kaasideg ti missiles kadakuada.
Nupay kasta, dumanon iti sangapulo agingga iti sangapulo ket lima a minuto, sakbay a sumangpet dagiti rocket bomb manipud iti sabali a lugar isu’t gapuna nga adda latta ti gundaway dagitoy nga aglemmeng kadagiti bomb shelter.
Iti laksid dagiti nakaam-amak a paspasamak iti Israel, nagbalinen a normal a mangngeg dagiti lokal ken Overseas Filipino Workers ti bomba.
Impaganetgetna pay a nataltalged pay laeng ti Israel ngem ti Lebanon ken Iran, gapu ta addaanda iti Iron dome.
Kinuna pay ni Eugenio, kas maysa nga Overseas Filipino Worker iti Israel ket kasapulanda nga agbalin a natibker para iti masakbayanda ken nangruna no adda dagiti pamiliada iti pagilian a mangnamnama kadakuana.
Nupay kasta, dadduma kadakuada ket makapaspasara iti depression, isu’t gapuna a liklik-likanda a mangipapaay iti damag iti mapaspasamak sadiay Israel kadagiti pamiliada iti pagilian tapno saanda a makapasar met iti stress.
Iti agdama, awan pay ti naipadamag a pimmusay a Pilipino ken nainget metten ti siguridad sadiay Israel.
Kabayatanna, nakasaganna metten dagitoy nga agsubli iti pagilian apaman a mangipaulog ti Israel ken pagilian a Pilipinas iti pammilin a kasapulan dagitoy a mapaawid iti pagilian.//mp4
