Natumba a kaykayo ken nadadael a kalkalsada ti kangrunaan a nadadael idiay munisipyo ti Kapangan bayat iti panagdalapos ti Super Typhoon Egay.
Iti panakiyuman ti Bombo radyo kenni Kapangan Mayor Manny Fermin, iti agdama agarup 30% paylaeng ti nasibuli iti linya ti kuryente iti nasao a munisipyo kasta met ti agpukaw-pukaw a linya ti telecommunications.
Sigun iti Mayor kas maibasar iti inisyal a report dumanon iti dua pulo ket pito a balay ti nailistada a partially damaged bayat nga innem a balay ti nailistada a totally damaged.
Dumanon met iti innem a pamilya ti naibakwit iti Day care center ken iti Senior Citizen Hall.
Kabayatanna dagiti nagbakwit kadagiti kaaruba ken kakabagyanda ket dumanon iti dua pulo nga indibidual.
Nailista met iti nasao a munisipyo ti tallo nga indibidual a nakapasar iti minor injury bayat iti panangisimpada kadagiti maitaytayab a paset ti balayda ken nataman kadagiti debris.
Awan met ti nailista a pimmusay iti nasao a munisipyo.
Kabayatanna, agtultuloy met ti panangmonitorda iti datos ti danyos iti sektor ti Agrikultura.
“awan piman ti signal, yun po ‘yung problema natin. Hindi po sila maka-feed in sa atin sa report natin”
Iti agdama passable dagiti kangrunaan a kalkalsada idiay Kapangan Benguet, nupay kasta agtultuloy met ti panangmonitorda kadagiti barangay road iti nasao a munisiypyo.
Innayon pay ni Mayor Fermin nga agtultuloy ti clearing operation kadagiti kaykayo a natumba iti nasao a lugar.
