BAGUIO CITY – Ag-debut iti main event ti ONE Championship ni Igorot MMA fighter Lito Adiwang babaen iti ONE: Next Gen III a maangay inton Nobyembre 26 sadiay Singapore Indoor Stadium.
Agserbi a main event ti strawweight fight iti nagbaetan ti Team Lakay fighter ken ti MMA veteran a ni Jared “The Monkey God” Brooks ti Amerika.
Agserbi met daytoy a debut ni Brooks iti ONE Championship, pito a bulan kalpasan ti inisyal a panakaituding ti laban dagitoy.
Maipalagip a napilitan ni Adiwang nga agsanod iti naituding a labanda kuma idi Abril ti agdama a tawen kalpasan a nagpositibo daytoy ti COVID-19.
Imet ni Adiwang ti rekord a 13 wins, 3 losses bayat nga imet ni Brooks ti rekords a 16 wins, 2 losses.
Immunan a limmaban ni Brooks kadagiti top MMA promotions kas iti Bellator ken UFC.
Naudi a limmaban ni Adiwang idi napalabas a Setyembre kontra kenni Hexi Getu ti China a nangabakanna babaen iti unanimous decision bayat a naudi a limmaban ni Brooks idi pay 2018.
