PHILIPPINES – Tamtamingen ita ti Commission on Higher Education ti ngumatngato a kaso ti panagkettel ti biag iti pagilian.
Kasaruno daytoy ti panagpirma ti nasao nga ahensiya ken ti maysa a nalatak a Pharmaceutical Foundation iti maysa a katulagan a makatulong a mangtaming iti ngumatngato a bilang dagiti agketkettel ti biagna partikular kadagiti estudyante iti pagilian.
Panggep ti nasao a katulagan a makaipaay ti guidance counselors, health staff ken student leaders kadagiti unibersidad ken colleges tapno maipangato ti panakaammo ken makatulong iti panakaliklik ti aniaman a kaso ti panagkettel ti biag.
Sigun kenni CHED chief Prospero De Vera, karaman dagiti school administrator ken faculty member iti Training of Trainers Program para iti suicide prevention.
Inlawlawagna a makatulong daytoy tapno agbalin nga epektibo a gatekeepers daytoy kadagiti pagadalan babaen iti proper identification ken daduma pay a wagas.
Maipalagip kas maibasar iti panagadal ti University of the Philippines Population Institute idi 2021, dumanon iti 20% kadagiti agtutubo a Pilipino ti nagpanunot iti panagkettel ti bukodna a biag.
Sigun met iti Department of Education, 404 nga estudyante ti pimmusay gapu iti panagkettel iti bukodna a biag idi school year 2021-2022 bayat a 2,147 ti nangpanggep iti panagpakamatay.
