Immapela iti korte ti maysa nga indibidual a nag-ngayangay iti kina-councilor sadiay Tabuk City kalpasan a nakanselar ti Certificate of Candidady daytoy para iti 2025 National and Local Elections.
Nupay kasta, daytoy ti nag-numero uno a nabutusan iti nasao a lugar.
Iti panakiuman ti Bombo Radyo kenny Atty. Gustavo Dalen, election officer sadiay Tabuk City, kinunana a ti rason iti panakakanselar iti Certificate of candidacy ti nasao a politiko ket gapu ta ti address nga inkargana ket saan nga “existing” rason a maysa daytoy a misrepresentation.
Sigun kenni Atty. Dalen, dumanon iti sangapulo ket uppat ti nagtaray iti councilor nupay kasta tallo kadagitoy ket naglusolus bayat a ti maysa ket nakanselar ti COC-na.
Inlawlawag ni Atty. Dalen a nabayag nga inurayna ti agbalin a desisyon ti main office ti Commission en Elections seknan kadagiti nagwithdraw ken nakanselar a COC ngem late a naiyulog ti desisyon.
Gapu iti dayta, idi maimprinta ti balota ket nainayun dagiti nagan dagiti uppat nga indibidual a nagtaray iti kina-konsehal a saan kuma a karaman.
Idi rummuar ti resulta, ti nagbalin a kaunaan a nabutusan kas councilor ket ti nakanselar ti COC-na rason a saan a naiproklama no sadino ti nagala iti posisyon ket ti maikadua agingga maika-sangapulo ket maysa a konsehal a nabutusan.
Iti sabali a bangir, nangipila iti centiorari ti konsehal a nakanselar ti COC-na iti korte suprema nangruna ket daytoy ti numero uno a nabutusan.
Kinuna ni Atty. Dalen, mauray pay laeng ti decision ti korte seknan iti nasao a banag.
