BAGUIO CITY – Nakemmegen ti numero uno a Top Most Wanted Person iti entero a Cordillera Region a suspek iti pammapatay iti tallo a taga-Besao, Mountain Province idi pay May 2019.
Immunan a nabigbig ti nasao a suspek a ni Marlon Batuli, 40-anyos, residente ti Tabacda, Tubo, Abra.
Nakemmeg daytoy sadiay Kili, Tubo, Abra babaen iti bileg ti warrant of arrest nga impaulog ni Judge Elizabeth Bringas ti Regional Trial Court – Branch 58, Bucay, Abra gapu iti tallo a bilang ti kaso a murder wenno pammapatay nga awanan ti nairekomendar a piyansa.
Naglemmeng ni Batuli kalpasan nga inaklonna iti sangwanan ti mayor ti Tubo, Abra a pinapatayna da Jansen Gabaen, Ronnie Macayba ken Pedro Sauyen ti Agawa Tribe sadiay Besao, Mountain Province.
Maipalagip a napan nagkalap dagiti tallo a biktima iti karayan nga asideg sadiay Baclingayan, Tubo, Abra ngem saanen dagitoy a nagaw-awid iti uneg ti makalawas.
Nabukel ti search party tapnu agsapul kadagiti tallo agingga a nasarakan laengen ti mutilated bodies dagitoy a napunno ti tama ti bala ti paltog ken saksak wenno tagbat.
Nagresulta ti insidente iti panagbara ti tension iti nagbaetan ti lima a barangay ti Besao, Mountain Province iti tribo ti Baclingayan, Tubo, Abra ngem dagus a napabaaw babaen iti peace talks nga indauluan ti Police Regional Office Cordillera.
