Idagdagadag ti Office of the Ombudsman ti pannakaipila ti kaso kontra kenni sigud a Budget Undersecretary Christopher Lao ken sumagmamano nga opisial ti Pharmally Pharmaceuticals Inc. para iti panaglabsingna ti Anti-Graft and Corrupt Practices Act seknan iti naanomalya a panggatangna ti P4.4 bilion a gatad ti medical supplies idi 2020.
Kidkiddawen ti nasao nga ahensia a rumbeng a mapilaan ti kaso ti sangapulo ket tallo a personel ti Department of Budget and Management – Procurement Service gapu iti palsification nga inaramidda iti sidong ti Revised Penal Code.
Mapapati nga inaramidda dagiti personnel ti palsification dagiti dokumento iti panaggatangda kadagiti surgical mask, personal protective equipment, ken dadduma pay a COVID-19 supplies.
Iti agdama, awan ti komento ni Lao, ti Department of Budget and Management ken dagiti opisial ti Pharmally Pharmaceuticals Inc.
Maipalagip nga idi Mayo 2024, pinasingkedan ti Ombudsman ti desisionna idi 2023 a nangibilin iti pannakaipila ti multiple graft charges kontra kadagiti opisial ti Lao ken Pharmally gapu iti anomalous procurement ti P4 billion a gatad dagiti RT-PCR COVID-19 test kits.
