BAGUIO CITY – Agtultuloy latta ti panagtrabaho dagiti healthcare workers sadiay Houston, Texas iti Estados Unidos ti Amerika iti baet ti krisis nga ituntunda ti COVID-19 pandemic.
Iti interview ti Bombo Radyo Baguio kenni Ana Marie Lallana (LALYANA) Llamido (LYAMIDO), maysa a caregiver sadiay Houston, Texas ken tubo ti Baguio City, imbingayna a kasapulanda latta ti agtrabaho gaputa isu ti sinapataanda a trabaho.
Dinakamatna a ti inhenyero nga asawana a taga-Baguio metlaeng ket naapektaran iti serye ti panag-lay-off kadagiti inhinyero iti oil and gas industry sadiay Texas ken iti panangideklara dagiti kompanya a sakop ti nasao nga industriya iti panakalugi.
Sigun kenkuana, idi pay umuna a lawas ti Marso a nagrugi ti panag-lay off kadagiti agtatrabaho iti oil and gas industry sadiay Texas kalpasan a limmaka ti gaas ken lana kas epekto ti agdama a pandemic.
Imbingay ni Llamido a mailaylayon agingga inton May 15 ti community quarantine sadiay Texas ken mairikep dagiti pagadalan iti nabatbati nga school year isut gapuna nga agbalin nga online ti klase dagiti estudyante.
Innayonna a nainget metlaeng ti implementasyon ti panagsuot iti facemasks ken gloves, panagsurot iti social distancing nupay kaaduan sadiay ket gumatgatangen iti online ken maitultulod laengen dagitoy.
Mamulta iti 1,000 US dollars wenno katukad ti nasurok P50,000 ken maibalud iti 180 nga aldaw dagiti dies-anyos nga agpangato sadiay Texas a makemmeg nga awanan ti facemask iti ruar ti balay dagitoy.
