BAGUIO CITY – Maipalpalagip manen kadagiti maseknan a real property tax payers iti siudad ti Baguio a mangrugin inton bigat, Lunes, January 3 ket mabalinen iti online ti assessment ti business ken bills/statement para iti real property tax.
Iti paka-ammo ti City Treasury Office, kasapulan laeng nga agrehistro iti www.ebpls.baguio.gov.ph para iti detalye no kasano nga agkiddaw ti business tax assessment ken wenno real property tax bills/statement.
Nupay kasta, mabalin a mai-download dagiti nasao a dokomento manipud iti official page ti Baguio In My Pocket.
Gapu iti baro a pagalagadan, saanen a maited sadiay City Hall ti Business Tax Assessment ken Real PProperty Tax Bill/Statement.
Naiyunay-unay a dagiti laeng addaan ti isyu iti real property dagitoy a saan a mabalin a maidalan iti online ti maasikaso wenno maakomodar iti City Treasury Office kabayatan dagiti naituding nga aldaw ti panagbayad ti buis.
Maibasar iti nairuar a pagalagadan, dagiti agrugi ti apelyido wenno corportate name iti A-H ket agbayadda iti Enero bayat a dagiti agrugi iti I-P ket iti Pebrero ken dagiti agrugi iti Q-Z ken dagiti agrugi ti numero wenno special characters ket iti Marso.
Babaen iti daytoy ket maliklikan ti panagkaurnong dagiti tattao iti City Hall One-Stop-Shop a posibe a pagtaudan ti panagwaras ti COVID-19.
Impetteng pay ni City Treasurer Alex Cabarrubias a dagiti laeng naka-schedule nga ag-renew ti business permit ti maakomodar kadagiti naituding a bulan.
Mapatawan met ti multa dagiti business owners a mapaay a mangpabaro iti business permit ti negosyoda iti naituding nga aldaw.
