BAGUIO CITY – Manarimaan ti online appointment iti facebook account ti COMELEC-Baguio para kadagiti kayatda ti agrehistro ken agala ti voter’s certification.
Iti interview ti Bombo Radyo Baguio kenni City Election Officer Atty. John Paul Martin, kinunana a paset daytoy ti baro a pagalagadan ti komisyon tapnu masalwadan dagiti kliyente ken empleyado ti opisinada kabayatan ti manarimaan a COVID-19 pandemic.
Kinunana a no maituloy ti operasyonda inton July 1 ken maituloy ti panagparehistro ket nasken nga agpa-book pay dagiti kliyente tapnu maliklikan ti atiddog a pila ken malimitaran ti face-to-face transaction iti opisinada.
Dinakamatna a nasken nga agpa-appointment iti online dagiti kayatda ti agparehistro kas botante ken agimprenta, i-fill up ken itugotda ti nasao a dokumento no agturongda iti COMELEC-Baguio iti naituding nga oras ken aldaw ti appointment dagitoy.
Inyunay-unayna nga awan ti online a voter’s registration gaputa masapul a personnal a maalaan iti biometrics dagiti agrehistro iti opisinada.
Innayonna nga uray iti COMELEC-Benguet ket masursurot ti kapada a sistema ti panagpa-appointment.
Imbingay pay ni Atty. Martin a tapnu agpa-book ket biruken laeng iti facebook account ti COMELEC-Baguio ken biruken iti home page ti button a ‘book now’ sakbay nga agpili iti aldaw ken oras a mapananda iti opisina.
Innayonna nga adun ti nagpa-book iti July 1 agingga 3.
Kagiddan iti daytoy, impanamnama a no matuloy inton July 1 ti operasyonda ket kabaelan ti opisinada nga akomodaren dagiti nagpa-appoint ken maipasiguradona ti natalged ken napartak a transaksion dagitoy. -GCBalegan
