BAGUIO CITY – Napatgan ti kiddaw ti grupo dagiti agididiaya ti masahe ken therapy sadiay Burnham Park, Baguio City a maipaayanda iti espasyo wenno pwesto iti asideg ti nalatak a parke.
Iti interview ti Bombo Radyo kenni Carlota Molina, dadaulo ti nasao a grupo, kinunana a nagbalin daytoy a resulta ti panakitaripnongda ken ni Mayor Benjamin Magalong idi Lunes.
Kinunana a maragsakanda iti panakaipaay kadakuada ti espasyo ti paset ti parking area nga asideg iti maysa a restaurant sadiay Burnham Park.
Dinakamatna nga insingasing ti lokal a gobyerno nga agingga laeng iti 22 a miyembro ti grupo ti ag-okupar iti nasao a baro a pwestoda iti innaldaw manipud iti kiddaw ti asosasyon a 30.
Naamuan a bukbuklen iti nasurok 80 ti grupo dagitoy.
Imbinglayna pay ni Molina a mangitudingda ti oras iti operasyonda tapno saan nga agbalin nga ‘eye sore’ ti panagmasaheda iti nasao a paset ti parke.
Dinakamatna nga awan paylaeng ti direktiba ti lokal a gobyerno ti Baguio no kaano a mangrugi ti operasyonda iti naipaay a baro a lokasyon para kadakuada.
Kabayatanna, naamuan a saan a napatgan ti operasyon dagiti manikyurista sadiay Burnham Park gapu iti isyu ti sanitation wenno kinadalus dagiti kagawaan dagitoy.
