BAGUIO CITY – Posible a maiyakar ti operasyon ti nalatak a night market a masarakan iti Harrison Road.
Iti interview ti Bombo Radyo kenni Rosalie Calise, presidente ti Association of Baguio City United Allied Vendors, Inc., posible a maiyakar ti operasyon ti night market iti entero a biking area ti Burnham Park iti kanito a maaprobaran iti lokal a konseho ti nasao a panggep.
Kinunana a daytoy ti resulta ti panakitaripnongda ken ni Darryl Kim Longid, security officer II ti Public Order and Safety Division (POSD) ti lokal a gobyerno ti Baguio.
Manamnama a maiyakar ti nasao a merkado sakbay nga agleppas ti agdama a tawen nangruna ta kiniddaw ti DPWH-Cordillera ti panakailukat ti Harrison Road para kadagiti motorista iti rabii.
Dinakamat ni Calise nga inkari pay ti POSD ti panakaimuntar wenno panakaikabil dagiti silaw iti pakaiyakaran ti night market.
Immunan a naisingasing ti panakaiyakar ti night market sadiay Athletic Bowl ngem saan a kinanunongan dagiti vendors gapo iti kaadayo ti nasao a disso.
Impanamnama met ti POSD a mailukat ti CR sadiay Burnham Park iti kanito a matungpal ti plano bayat nga impasigurado dagiti night market vendors ti panagtalinaed ti kinadalus iti pakaiyakaran ti night market.
