BAGUIO CITY – Puntirya ti lokal a gobyerno ti Baguio City a mairugi inton April 14 ti operasyon ti sigud a Santo Niño Hospital a masarakan sadiay P. Burgos Barangay kas treatment center wenno critical care facility para kadagiti pasyente ti COVID-19.
Sigun kenni Mayor Benjamin Magalong, ‘all systems go’ ti panakaisagana ti pasdek, pakairamanan dagiti pasilidad daytoy, dagiti agserbi a manpower ken dagiti dadduma pay nga aspeto para iti naan-anay nga operasyon.
Sigun met kenni Dr. Paul Adlai Quitiquit, dadaulo ti grupo a nadutukan a mangisagana iti treatment center, kasapulan ti tallo a lawas para iti panakaisagana ti pasilidad.
Innayonna nga ipimpinaldan ti singasing a maisumitir iti lokal a gobyerno para iti operasyon ti baro a center.
Isumitirna pay dagiti rekomendasyon para iti panagaplikar ti pasilidad iti ‘license to operate’ kas specialty hospital nga addaan tulong manipud iti Department of Health.
Immunan nga impasigurado ni Mayor Magalong ti panaka-aramid dagiti addang ken sistema tapnu maipanamnama nga awan ti mapasamak a kontaminasyon kadagiti agindeg iti aglawlaw ti pasdek.
Maipalagip a nagsardeng ti operasyon ti sigud nga ospital idi 2009 ken addaan daytoy iti kapasidad nga aglaon iti 36 a kama.
