Inlawlawag ti Department of the Interior and Local Government nga awan ti mapalubosan nga agtakem nga opisial malaksid no nagtungpal iti panangisubmitir ti statement of campaign expenses iti Commission on Elections.
Sigun iti nasao nga ahensia, saanda a bigbigen ti panagtugaw wenno aniaman nga oath-taking dagiti opisial a napaay a mangipila ti statement of campaign expenses wenno SOCE dagitoy.
Nakalanad iti Section 14 ti Republic Act No. 7166 ken iti Commission on Elections (COMELEC) Resolution No. 10730 nga amin a kandidato ken political parties iti May 2025 elections ket nasken a mangipila iti SOCE inton Hunio 11, 2025, nga awan ti pannakailaylayonna.
Ti panangipila ti SOCE ket maiyaplikar kadagiti amin a kandidato, nabutosan man wenno saan.
Kinuna ti nasao nga ahensia ti SOCE requirement ket mangitandudo iti transparency ken accountability iti pannakaisayangkat ti eleksion ken iti panagaramat ti campaign funds.
Agserserbi pay daytoy kas maysa a wagas iti panagtungpal kalpasan ti eleksion tapno maipasigurado ti integridad ti public office ken tapno mapatibker ti panagtalek ti publiko kadagiti proseso ti eleksion.
