BAGUIO CITY – Manamnama nga agtaripnong dagiti opisial ken constituents ti sangapulo ket uppat a barangay iti siudad ti Baguio a masakupan iti City Camp Lagoon.
Daytoy ket tapno mapagsaritaan dagiti nagduduma a wagas wenno addang a maipatungpal iti nasao a lugar ken kasta met a mapalagipan dagitoy maipapan iti disiplina ti panangibellengda ti basura.
Kasaruno daytoy ti napasaran a panagtapaw dagiti sumagmamano a lugan iti City Camp Lagoon gapu iti basura nu sadinno dagos a napullatan daytoy sumagmamano laeng nga oras a panagbayakabak ti tudo.
Iti interview ti Bombo Radyo kenni Baguio City Councilor Rocky Aliping, dinakamatna a dagiti barangay a makipaset ket ti Gefa Barangay, Lower QM, Dominican Barangay, City Camp Area, Burnham Legarda, Quezon Hill ken dagiti dadduma pay.
Kinuna ti nasao nga opisial a numan pay adda ti ipatpatungpal ti gobierno a programa a kas ti “Alay sa Kalinisan”, mai-devolved latta daytoy kadagiti opisial ti barangay ken empelyado.
Imbinglay pay ti nasao nga opisial nga addan dagiti napili a miembro ti TUPAD tapno aglinis ken mangmintinir iti Camp Lagoon.
Kabayatanna, manamnama metlaeng a maipawil ti agparada iti paset ti City Camp Lagoon gapu iti napasamak a panagtapaw dagiti lugan sadiay.//Bombo Benjo Guzman
