BAGUIO CITY- Naipatungpal ti public Consultation para kadagiti maisaksakad nga ordinansa a pagnumaran dagiti estudiante iti siudad ti Baguio.
Iti pannakiuman ti Bombo Radyo kenni Baguio City Councilor Vladimir Cayabas, kinunana nga adda dagiti tallo nga ordinansa nga imparangda iti publiko.
Panggep ti nasao a Public Consultation a makaala iti nagduduma a singasing manipud kadagiti maseknan nga opisina, Public ken Private School, Local Government Unit ken dadduma pay.
Sigun kenni Councilor Cayabas, karaman kadagiti insingasingda ti Institutionalization iti Voters Education Program iti siudad ti Baguio.
Panggep ti nasao a gakat nga ipaayan iti giya dagiti baro a bontante iti siudad ken ipakaammo dagiti karbenganda kas bontante ken dadduma pay.
Malaksid iti dayta, naiparang metlaeng iti publiko ti gakat a music festival iti siudad ken ti provision of school supply to indigent and qualified student.
Inlawlawag ni Councilor Cayabas a ti provision of school supply to indigent and qualified student ket addaan panggep a tumulong kadagiti qualified ken indigent student nangruna dagiti naka-enroll iti Senior Highschool.
Iti kanito maaprobaran daytoy, manamnama a mailatang ti P3 Million para iti nasao a gakat.
Dagiti maikari nga umawat iti tulong manipud iti provision of school supply to indigent and qualified student ket kasapulan a taga-Baguio; indigent ken masapul nga opisyal a nakaenroll iti basic education pribado man wenno saan.//mp4
