BAGUIO CITY – Inaprobaranen ti lokal a konseho ti Baguio ti maysa nga ordinansa para iti mandato a pannakaipatungpal ti physical distancing iti intero a siudad agingga nga adda ti pangta ti COVID 19.
Sakup ti ordinansa ti amin a lugar ti pagtrabahuan, negosio, dagiti aktibidad a pasetan ti adu a tattao, kadagiti para publiko a luglugan ken dadduma pay.
Ipawpawil pay ti ordinansa ti angkas kadagiti motorsiklo tapno maobserbaran ti physical distancing.
Iti sidong ti ordinansa, mapatawan iti P500 a multa dagiti aglabsing iti umuna a gundaway, P1,000 iti maikadua a gundaway ken P3,000 iti maikatlo a panaglabsing.
Agbalin nga akem dagiti drivers ken operators ti panagtalinaed ti social distancing kadagiti para publiko a luglugan.
Mapatawan iti administrative disciplinary action ti asinoman nga opisial wenno empleado ti gobierno nga aglabsing iti physical distancing.
