Ampucao, Itogon, Benguet- Kidkidawen ni Cathylaine Kyle B. Acop, kaanakan ni Joseph Sacpa, ti natakawan ti P152,000 a naglakuanna ti balitok, nga agparang ken agpudno dagiti indibidual a nangala wenno nakapidot ti nasao a gatad.
Iti interview ti Bombo Radyo Baguio kenni Cathylaine, imbinsa-binsana a nagturong ti ulitegna idiay Altigas residence idiay Simpa, Ampucao, Itogon, Benguet tapno ilako ti balitok a nagbannuganda iti panagminas iti oras ti alas 2 ti malem idi Agosto 26, 2024.
Nagdagas ti ulitegna a ni Joseph iti maysa a kantina tapno gumatang ti tinapay.
Kalpasan ti panaggatang ni Joseph, naglugan daytoy iti jeep a nagtaud iti Baguio City paturong idiay Simpa, Ampucao, Itogon, Benguet.
Sigun kenni Cathylaine, tallo ti kakadua ni Joseph a lallaki iti uneg ti jeep.
Kalpasan iti sumagmamano nga oras a panagbiahe dagitoy, bimmaba ti ulitegna iti paradaan wenno asideg ti kantina.
Nagna pay ti ulitegna iti paradaan ti motor iti nagdisaaganna ket nasukimat daytoy nga awanen ti kuarta a P152,000 a naikabil iti cellophane a “transparent.”
Patienda a natnag ti kuarta iti uneg ti jeep nangruna iti nagtugawan ni Joseph gaputa narabaw ti bulsa daytoy.
Dagos met a nagturong daytoy iti jeep a naglugananna ket kinasaritana dagiti lallaki a nakalugananda ngem sigun kadagitoy, saanda a nakita ti naka-cellophane a kuarta.
Maibasar met iti “statement” ti maysa a babai a nakilugan iti jeep a pasang-at pay idiay Simpa, Ampucao a nagluganan ni Joseph, nakitana dagiti tallo a lallaki a nagturong iti “waiting shed” nga iggem ti cellophane a mapapati a naglaon ti kuarta ni Joseph.
Sadiay a nakita ti babai a nagsasarita dagitoy ken inukradda ti cellophane.
Kabayatanna, nagtuloy latta iti panagsapul ni Joseph ngem saanna a mabirukan ti kuarta daytoy, agingga iti agdama.
Kinasarita metten ti asawa ni Joseph dagiti dua a lallaki ngem adu ti rason ken agpipinnabasul dagitoy.
Nagturongda metten iti Aries Store nga addaan ti CCTV footage ngem naduktalan a na-delete ti video iti August 26.
Iti agdama, sapsapulenda ti maysa a lalaki a kadua dagiti dua a lalaki a nakakawes ti maong a terno tapno maamuan nu daytoy ti nangala iti nasao a gatad.
Manarimaan metten ti panagalada ti CCTV iti sanguanan iti paradaan ti jeep a pa-Ampucao ditoy Baguio City.
Inreport metten ni Cathylaine ti nasao a banag iti barangay ken posible a maipaayab dagiti tallo a lallaki iti opisina ti Barangay Captain idiay Ampucao.
