BAGUIO CITY – Dinadael dagiti otoridad ti P21.9-M a gatad dagiti pinuon ti marijuana iti lima nga aldaw nga eradication operations sadiay Benguet ken Kalinga manipud April 6 agingga April 10 iti agdama a tawen.
Sadiay Badeo, Kibungan, Benguet, dinadael dagiti otoridad ti 4,700 a pinuon ti marijuana nga aggatad ti P940-K iti maysa a communal forest sadiay nga addaan kalawa a 700 square meters.
Sadiay Kayapa, Bakun, Benguet, dinadael dagiti otoridad ti 24,100 a pinuon ti marijuana nga aggatad ti P4.82-M manipud iti uppat a pagmulaan kadagiti communal forests dagiti sitio ti Bulisay, Agay-ay, Lepsik ken Wading nga addaan kalawa a 2,800 square meters.
Kabayatanna, dinadael met dagiti otoridad ti 10,800 a pinuon ti marijuana nga aggatad ti P2.16-M manipud iti tallo a pagmulaan a nadiskobre sadiay Lacnog, Tabuk City, Kalinga nga addaan kalawa a 1,800 square meters.
Dinadael pay dagiti otoridad ti 3,100 a pinuon ti marijuana nga aggatad ti P6.2-M manipud iti kabambantayan ti Chumanchil, Tinglayan, Kalinga nga addaan kalawa a 4,700 square meters.
Nasarakan metlaeng iti nasao a disso ti 65 a kilo ti napagango a bulbulong ti marijuana ken maysa a kilo ti bukbukel ti marijuana nga aggatad amin ti P7.825-M.
Ti operasyon ket paset ti agtultuloy a kampanya dagiti otoridad tapnu madalusan ti Cordillera Region manipud iti iligal a droga ken maragpat ti drug-free Cordillera.
