Naisingasing iti lokal a gobyerno ti Baguio City ti panagsingir iti P250 a congestion fee kadagiti pribado a lugan ken bisita nga addaan ti lugan nu sumrek dagitoy iti central business district.
Mapasamak daytoy nu maaprubaran ken maipatungpal ti insingasing ti Metro Pacific Tollways Corporation (MPTC) nga Smart Urban Mobility Project.
Sigun iti MPTC, ti panagsingir ti congestion fee ket maipatpatungpal iti dadduma a pagilian kas iti Singapore, London, Stockholm, Miland ken New York tapno maksayan ti attidog a trapiko, carbon emission ken maksayan ti panagkonsumo ti enerhiya.
Panggep pay ti nasao a proyekto a madisiplaan dagiti driber ken motorista ken manayonan ti pammastrekan para iti ekonomiya ti siudad.
Iti nasao a singasing, mailaksid iti P250 congestion fee dagiti lugan nga imanmaneho dagiti senior citizen, persons with disability, uniformed personnel a nakaduty ken dagiti emergency response vehicles.
Nailanad pay iti singasing a maipaayan iti diskwento dagiti taxi ken dagiti lugan ti gobyerno la ketdi adda ti naaprubaran a travel order dagitoy bayat a dagiti residente ti siudad ket kwalipikado iti rebate.
Sigun kenni City Administrator Bonifacio Dela Peña, manarimaan ti negosasyon ti siudad para iti terms and conditions sakbay a maisumitir iti lokal a konseho para iti kaskenan nga aksyon.
