“Parang walang ginawa,” dayta ti kinuna ni President Ferdinand Marcos Jr. iti panagsarungkarna iti rock shed idiay Camp 6, Kennon Road Kennon Road, Tuba, Benguet ken iti Rocknetting Project idiay Camp 5 iti kapada a munsipyo.
Sigun iti presidente,awan ti epekto wenno serbi ti nailatang nga agarop PhP260million iti rock shed gapu ta saan a natrabaho daytoy a nasayaat ken nagtennag laeng iti bulsa dagiti manmano.
Dismayado a kinuna ni President Marcos Jr. nga arigna ket naibelleng laeng ti kwarta ti umili nangruna ket kasapulan manen iti sabali pay a PhP260 million agingga PhP500 million tapno matarimaan daytoy.
Gapu iti dayta, impettengna a saan laeng a physical damage ti makita iti nasao a kalsada nu di ket nakaapektar pay daytoy iti pagbiagan dagiti umili, ken iti ekonomiya.
Maipalagip kabayatan ti panagdalapos ti bagyo idi Hulyo,napasamak ti soil erosion, landslide, ken rockslide iti nagduduma a lugar ti Baguio-Benguet.
Maysa kadagitoy ti napasamak iti rock shed idiay Kennon Road a nakaitunda iti panagrekepna.
Iti naipatungpal nga inspeksyon, naduktalan a saan a natibker ti naaramid a protection wall iti nasao rock shed.
Kabayatanna,impanamnama ni President Marcos Jr. a saanna a panawan ti opisinana agingga a marisut dagiti inladawanna a problematic flood control projects.//Bombo News Team
