BAGUIO CITY – Dinadael dagiti otoridad ti pakabuklan a P3-M a gatad dagiti pinuon ti marijuana a nadiskobreda iti nagsina nga eradication operations kadagiti probinsia ti Kalinga ken Benguet.
Nadiskobre dagiti operatiba ti mapattapatta a 10,000 a pidaso ti fully grown marijuana plants a naimula iti kabambantayan a paset ti Napsong, Madaymen, Kibungan.
Mapattapatta nga aggatad dagitoy iti P2-M.
Nadiskobre met dagiti operatiba ti mapattapatta a 5,000 a pidaso ti fully grown marijuana plants nga aggatad ti mapattapatta a P1-M iti nagsina a pagmulaan sadiay Buscalan, Tinglayan, Kalinga.
Dagus a pinarut ken inuram dagiti otoridad dagiti iligal a mula malaksid iti naala a samples nga agserbi nga ebidensia.
Maibasar iti rekord ti PRO-Cordillera, dumanonen iti 78,583 a pinuon ti dadakkel a marijuana ken 2,500 a pinuon ti semilya a marijuana nga aggatad ti P15.816-M ti pinarut ken inuram dagiti law enforcement agencies ditoy rehiyon manipud iti walo nga eradication operations iti laeng bulan ti Nobyembre ita a tawen.
