BAGUIO CITY- Dinadael dagiti kameng ti Smoke-Free Baguio Task Force, Public Order and Safety Division wenno POSD ken dagiti opsiyales ti lokal a gobierno ti Baguio ti P870K a gatad ti sigarilyo ken dadduma pay a tobacco products iti sangoanan ti City Hall idi kalman.
Sigun kenni POSD Deputy Head Daryl Kim Longid, adu paylaeng dagiti aglablabsing iti Smoke Free Ordinance iti siudad.
![](https://img.bomboradyo.com/baguio/2022/03/TOBACCO-DESTRUCTION-JAN-2022-BAGUIO.jpg)
Maibasar iti datos, dumanon iti 89.5 kilos nga aggatad iti 870K ti gatad ti dinadaelda idi kalman a pakairamanan ti 43 a pidaso ti vape units a nakumpiskar iti uneg ti maysa a tawen.
Kinunana a nakumpiskar dagiti sigarilyo kadagiti store nga agilaklako kadagiti sigarilyo ken kadagiti metlaeng indibdiual a naaktuan nga agsigsigarilyo kadagiti maiparit a lugar.
Iti datos metlaeng ti POSD, dumanon iti 449 dagiti invidual violator iti bulan ti Enero agingga iti bulan ti Disiembre idi napalabas a tawen bayat a dumanon iti 978 ti establishimento a naglabsing iti ordinansa idi napalabas a tawen.
Dumanon metten iti 88 nga indibidual ti naglabsing iti pagalagadan iti bulan ti Enero agingga Pebrero ita a tawen bayat nga 80 met ti naglabsing kadagiti establishimento.
Kabayatanna, inlawlawag ni Longid a dumanon iti P2-k ti multa dagiti indibidual a maaktuan nga agar-aramat ken agilaklako ti sigarilyo; P3-k iti second offense ken P5-k iti succeding offense.