BAGUIO CITY – Dumanon iti P8.77-M a gatad dagiti marijuana ti dinadael dagiti nagtipon a pwersa ti otoridad iti tallo nga aldaw a marijuana eradication operation dagitoy iti nagduduma a disso sadiay Tinglayan, Kalinga idi napalabas a lawas.
Naisayangkat ti panagparut kadagiti mula a marijuana iti lima nga aga-asideg a puntirya a disso sadiay Barangay Tulgao West nga addaan ti kalawa a 2,250 metro kwadrado.
Nagresulta daytoy iti panaka-uram ti 43,850 a fully-grown marijuana plants nga aggatad ti P8.77-M.
Nupay kasta, awan ti cultivator a nakemmeg kabayatan ti operasyon.
Sigun met kenni PCol. Davy Vicente Limmong, dadaulo ti pulisya ti Kalinga, agtultuloy ti marijuana eradication ken saan daytoy a sumardeng iti baet ti arigna imposible a panakatungpal ti naan-anay a panakadadael dagiti pagmulaan ti marijuana sadiay.
Kabayatanna, dinadael metlaeng dagiti otoridad ti dumanon P580,000 a gatad dagiti marijuana sadiay Sadawikan, Pasdong, Atok idi kanikadua.
Maibasar iti report ti Atok Municipal Police Station, naparut ti 2,900 a pidaso ti mula a marijuana iti dua a plantation sites nga addaan kalawa a 580 metro kwadrado.
