BAGUIO CITY — Natiliw ti uppat a lallaki kalpasan a nakumpiskar kadagitoy ti P990,000 a gatad dagiti marijuana iti naisayangkat a checkpoint/interdiction operation sadiay Ampawilen, Poblacion, Sadanga, Mountain Province idi rabii.
Nabigbig dagitoy a da Laurence Bautista Ignacio, 21; John Ceasar Padilla, 20; Dan Mark Roa Delos Reyes, 21; at si Vince Marie Robles Cruz, 21, bin-ig a residente ti Parang, Marikina City.
Naisayangkat ti operasyon kalpasan a nakaawat dagiti operatiba iti impormasyon seknan iti panakaibiahe dagiti iligal a droga.
Gapu iti daytoy, dagus a nangibangon iti checkpoint dagiti operatiba ti PNP ken PDEA ken sadiay a pinarada ti nangisit a Toyota Avanza nga addaan ti conduction sticker number P8S390 a nagtaud iti direksyon ti Kalinga.
Sinukimatda ti nasao a lugan ken sadiay a nadiskobre ti walo a marijuana bricks, maysa a tubular-shaped marijuana ken dua a ball-shaped marijuana leaves nga addaan ti fruiting tops.
Nakumpiskar pay kadagitoy dagiti smoking pipes a sigun iti PDEA-Cordillera ket mangipakpakita iti panagaramat dagiti uppat iti marijuana kabayatan ti panagbiyaheda.
Nagresulta daytoy iti panangtiliw dagiti otoridad kadagiti uppat nga indibidual nga ita ket sumangsangon iti kaso a panaglabsing iti Comprehensive Dangerous Drugs Act of 2002.
Naamuan pay iti PDEA-Cordillera a ti grupo ket karaman kadagiti drug pushers nga agilaklako ti marijuana babaen iti online, no sadino, adda ti sites nga ar-aramaten dagitoy para iti nawaya a panagilako ken diskusyon iti panagaramat ti iligal a droga kagiddan ti panangkaritda kadagiti panakabagi ti linteg a mangkemmeg kadagitoy.
