BAGUIO CITY- Inlawlawag ti Baguio Water District (BWD) ti pakaseknan dagiti umili mainaig iti panakaideliver ti danom iti lokaliadad kadagiti naglabas nga aldaw wenno kabayatan ti nepnep.
Iti interview ti Bombo Radyo Baguio, inaklon ni BWD General Manager Engr. Salvador Royeca a naapektaran ti operasion dagitoy gapu iti epekto ti habagat ken adu dagiti linya wenno tubo dagitoy ti nadadael gapu iti nakaru a panagtutudo ken panaglayus.
Kinunana a maysa a rason ti pannakapukaw ti supply ti kuryente gaputa daytoy ti maysa nga ar-aramatenda tapnu maituloy ti produksyon dagitoy malaksid pay kadagiti kalkalsada a nakapasaran ti panagreggaay nu sadinno nadadael ti sumagmamano a linya wenno tubo dagitoy.
Impettengna a sumay-sayaat wenno maisubsubli itan ti normal a pannakaideliver wenno supply ti danom iti siudad gaputa agtultuloy ti panakatarimaanda kadagiti nadadael a tubo wenno linya ti danom.
Kabayatanna, inlawlawagna met a maipaayan iti umno nga aksion dagiti umili a makaaw-awat iti saan nga umno nga billing statement dagitoy.
Kinuna ni Engr. Royeca a dagus nga aksionan ti BWD dagiti pakaseknan babaen iuti panakakorektar ti bayadan ti maysa a konsyumer apaman a maberipikar a biddut iti operasionda ti rason daytoy.
Impettengna pay a saan nga amin a proyekto ti panagkali iti siudad ket aramid wenno proyekto ti BWD isut gapuna a kidkiddawenna ti panangimuntar met ti lokal a gobyerno iti signages kadagiti patrabaho dagitoy.
