BAGUIO CITY – Manarimaan ti koordinasyon ti probinsial a gobierno ti Abra iti Department of Education (Dep-Ed) – Abra para iti panaka-aramat dagiti pagadalan sadiay kas temporary isolation facility dagiti asymptomatic wenno dagiti nakaptan ti COVID-19 nga awanan ti sintomas.
Sigun kenni Governor Joy Bernos, maysa daytoy nga addang ti probinsiya a mangtulong kadagiti ospital ken temporary treatment areas ti Abra a napumpunon gapu iti panagngato ti kasoda iti COVID-19.
Kinunana nga iti agdama ket maiturturong latta kadagiti pagagasan dagiti agpospositibo iti COVID-19 nangruna dagiti addaan ti sintomas, partikular dagiti severe cases ken critical cases ti nasao a sakit.
Kabayatanna, inyunay-unayna a panggepda a lapdan ken mapababa ti bilang dagiti agpospositibo ti COVID-19 sadiay Abra a rason ti panakaipasidong ti probinsia iti localized Enchanced Community Quarantine.
Kinuna ni Governor Bernos a saan nga agbayag ti panakaipasidong ti probinsia iti lockdown la ketdi bumaba ti kaso dagitoy.
Inlawlawagna pay ti panakaiparikkep ti sumagmamano a pasdek sadiay tapnu awan ti rason a rumuar dagiti umili nangruna dagiti awan ti napateg ti gagarana iti publiko.
Sigun pay kenkuana, ibalbalanseda laeng ti panakasalaknib dagiti umili isut gapuna a palpalagipanna dagiti Abreños a liklikanda a rumuar no saan a napateg iti gagara dagitoy.
